«ҮЗДІК СЫНЫП ЖЕТЕКШІСІ-2022»

Шымкент қалалық білім басқармасына қарасты №26 Жамбыл атындағы мектеп-гимназиясында тәрбие орынбасарларының жоспарына сәйкес «Үздік сынып жетекші – 2022» байқауы болып өтті. Байқаудың мақсаты – сынып жетекшілердің өзара тәжірибе алмасуына, шығармашылық зертханасын айқындауға, оқушыларға білім берудегі өзгерістерді еркін меңгеруге бағытталған.

Сайыс екі кезеңде өтті. Оның бірінші кезеңі, яғни сырттай кезеңінде сынып жетекшісінің жаңа үлгідегі инновациялық жұмыстарының жинағы (портфолио) өткізілді. Портфолиодағы тәрбие жұмысының мақсаты мен міндеттерінің нақтылығы, дәйектілігі басты назарға алынды.

Сонымен қатар сынып жетекшілер оқушылармен еркін тақырыпта ашық тәрбие сағатын өткізіп, креативті, жаңашыл әдіс-тәсілдерді пайдаланды. Бұл жерде тек сабақ тақырыбының мазмұндылығы ғана емес, ұстаз бен оқушылар арасындағы тығыз қарым-қатынасқа баса назар аударылды.

Байқаудың екінші кезеңі мектеп акт залында өтті. Онда сайыскерлер бірнеше тапсырмаларды орындап, тәрбие жұмысының басым бағыттары мен ерекшеліктерін көрсетумен қатар, өз өнерлерінде ортаға салды.

Байқаудың барлық ереже-талаптарын орындап, жұмыстарын нақты, түсінікті, нағыз сынып жетекшісіне тән әдістемелік тілмен баяндаған ұстаздарды жүлделі орындар мен номинациялармен әділқазылар алқасы марапаттады. Бірінші орынға лайықты деп 9 «Б» сынап жетекшісі Райбекова Гулвира танылып, алдағы уақытта өтетін аудандық «Үздік сынып жетекшісі» байқауына жолдама алды.

Байқауға қатысушы Жаманқұлова Шынар мен Абдикаримова Раушан ІІ-ІІІ орындарды өзара бөліссе, Қарағұлова М, Алиханова Р, Орынбаева М «Ізденімпаз сынып жетекші»,«Шығармашыл сынып жетекші» және «Өнерлі сынып жетекшісі» номинацияларымен марапатталды.

Мектеп-гимназия директоры Қайкенова Гүлсара Жумадуллақызы осы байқауды ұйымдастырушы тәрбие орынбасарларына және байқауға қатысушы ұстаздарға өз алғысын білдірді.